Een lustig Speel rund üm Football, Fründschap un Deerns – na een wohrhaftige Begevenheit.
Hier geiht dat nich blots üm Football. Mit veel Witz, een Prise Gesellschaftskritik un allerhand Trubel in de Familien warrt dat Publikum op´t best ünnerhollen.
Taiwan, 1980: De erste inoffiziell U18-Weltmeisterschap röppt – un de düütschen Footballdeerns wüllt dorbi sien. Wiel dat aver noch keen Nationalmannschap gifft, kriggt de DFB-Beopdragte Gaby Popp den Opdrag, ut de beiden Bookholter Vereene een Neddersassen-Utwahl för Deutschland uptostellen.
Man dat gröttste Problem is nich de Sport: De Verband hett keen Geld.
De Speelerschen mööt de Reis sülvst finanzeren. För de Familien Haidmärker un Lönsberger fangt dormit de Problemen erst richtig an.
De veer Dochters speelt in verscheden Verene un mööt eerst lehrn, sik to troen un tosamen tohollen. Ut Rivalinnen schall een starke Mannschap warrn.
Dorto kümmt de Kamp gegen ole Vöroortelen: gegen Froons, gegen Deerns un gegen Football för Deerns.
Een temperamentvull Stück twüschen Sport, Familie un Gesellschap! Mal komisch, mal chaotisch, mal to´n nadenken, aver jümmers vun Harten un mit Humor.
Foto: Jürgen Frank
